ಭಯದ ಭಯ

ಭಯವೆಂದರೆ ಭಯ
ನನಗೆ, ಭಯವೆಂದರೆ ಭಯ

ಭಯ ಭೂತ, ಭಯ ಪಿಶಾಚಿ,
ಬಂದು ಮೆತ್ತಿಕೊಂಡಿತೆಂದರೆ
ಬಿಡದೇ ಬಿಡದು

ಟ್ರ್ಯಾಕಿನಲ್ಲಿ ಎಲ್ಲರಿಗೂ ಮುಂದೆ
ಓಡಬೇಕಾದವನ ಕಾಲು
ಹೂತು ಹೋಗಿ, ಮೇಲೇಳದಂತೆ
ಮಾಡಿತ್ತು ಭಯ

ಪರೀಕ್ಷೆಯಲ್ಲಿ ಪುಟಗಳನ್ನು
ತುಂಬಿಸಬೇಕಾಗಿದ್ದವನ ಕೈ
ಜಡಹಿಡಿದು ಬೀಳುವಂತೆ ಮಾಡಿತ್ತು ಭಯ

ತನ್ನ ಮೇಲೆ ಹರಿಹಾಯುವ ಬಾಸಿನ
ಮುಖಕ್ಕುಗಿದು ಹೊರನಡೆಯುವ ರೋಷವನ್ನು
ಐಸ್ ಕ್ಯೂಬಿನಂತೆ ತಣ್ಣಗೆ ಮಾಡಿತ್ತು ಭಯ

ಅದಕ್ಕೇ ನನಗೆ ಭಯವೆಂದರೆ
ಬಹಳ ಭಯ
ದೂರ ಓಡಿದ್ದೇನೆ ಅದರಿಂದ
ನನ್ನ ಹತ್ತಿರವೂ ಸುಳಿಯಗೊಡದೆ